ሃንደበታዊ ምቅይያር ጳጳሳትን ሊቃነ ጳጳሳትን ካብ - ናብ ሃገረ ስብከት

በስመ አብ ወወልድ ወመንፈስ ቅዱስ አሐዱ አምላክ።

ኦርቶዶክሳዊት ቅድስት ቤተ ክርስቲያን ኤርትራ፡ ኣብ ውሽጥን ኣብ ወጻኢን ኣብ ዘለዉዋ ኣህጉረ ስብከት ብዝለዓለ ሓላፍነት  ነነዊሕ ዓመታት ተመዲቦም ምእመናይ ይጓስዩ ካብ ዘለዉ ክቡራን ጳጳሳትን ሊቃነ ጳጳሳትን ንዝበዝኁ ናይ ሃገረ ስብከት ምቅይያር ከምዝተገብረሎም ካብ ኣሥመራ ዝበጽሓና ዘሎ ዜና መንበረ ፓትርያርክ የመልክት።

ቅድስት ቤተ ክርስቲያንና ምስ ቅብጣዊት ቤተ ክርስቲያን ኣብ ፲፱፻፺ (1998) ዓ.ም. ብዝገበረቶ ወግዓዊ ስምምዓት ናታ ልዑላዊ ዝኾነ መንበረ ፓትርያርክን መናብርተ ጵጵስናን ኣቚማ ርእሳ ክኢላ ክትካየድ ካብ ዝጀመረትሉ፡ እዚ ከምዚ ዝኣመሰለ ብዝኂ ዘለዎ ምቅይያር ሃገረ ስብከት ክግበር እቲ ዝዓበየ ምዃኑ ምንጪታትና ኣመልኪቶም።

በዚ ሕጂ ተገይሩ ዘሎ ምልውዋጥ ኣህጉረ ስብከት ከኣ፦

1. ብፁዕ አቡነ ሰላማ፦ ተሓጋጋዚ ቅዱስ ፓትርያርክ ዝነበሩ፤ ብሕጂ ሊቀ ጳጳስ ሃገረ ስብከት ደቡብ - መንደፈራ
2. ብፁዕ አቡነ ቄርሎስ፦ ሊቀ ጳጳስ ደቡብ - ዓዲ ቀይሕ ዝነበሩ፤ ከም ዘለዉዎ ክቕጽሉ
3. ብፁዕ አቡነ ዮሐንስ፦ ሊቀ ጳጳስ ሃገረ ስብከት ዓንሰባ ዝነበሩ፤ ብሕጂ ሊቀ ጳጳስ ደቡባዊን ሰሜናዊን ቀይሕ ባሕሪ
4. ብፁዕ አቡነ ማርቆስ፦ ጳጳስ ሰሜናዊ ሃገረ ስብከት ዝነበሩ፤ ብሕጂ ጳጳስ ሃገረ ስብከት ኣውሮጳ
5. ብፁዕ አቡነ ጴጥሮስ፦ ጸሓፊ ቅዱስ ሲኖዶስን ጳጳስ ደቡባዊ ቀይሕ ባሕሪ ዝነበሩ፤ ብሕጂ ጳጳስ ዞባ ማእከል
6. ብፁዕ አቡነ ሉቃስ፦ ጳጳስ ሃገረ ስብከት ጋሽ ባርካ ዝነበሩ፤ ብሕጂ ጳጳስ ድባርዋ
7. ብፁዕ አቡነ ባስልዮስ፦ ጳጳስ ዞባ ማእከል ዝነበሩ፤ ብሕጂ ጳጳስ ዓንሰባ
8. ብፅዕ አቡነ ሼኑዳ፦ ጳጳስ ሃገረ ስብከት ሰሜን ኣሜርካን ካናዳን ዝነበሩ፤ ንጊዜኡ ኣብ ዘለዉዎ ክጸንሑ።
9. ብፅዕ አቡነ አትናቴዎስ፦ ጳጳስ ኣውሮጳ ዝነበሩ፤ ብሕጂ ጳጳስ ጋሽ ባርካ

ኮይኖም ስርሖም ክቕጽሉ ብዕለት ፳፭ ሚያዚያ ፳፻ወ፬ ዓ.ም. (03/05/2012) ኣብ ዝተጋብአ ኣኼባ ቅዱስ ሲኖዶስ ተገሊጹ ኣሎ። እዚ ዝተገብረ ለውጢ ብመንጽር እዋናውነቱ ይኹን ኣገዳስነቱ፤ ብመንጽር መበገሲ ምኽንያቱ ይኹን ዕላማ ከወንቱ፤ ብመንጽር ቀጻሊ ሳዕቤኑ ይኹን ጽልዋታቱ፤ ብመንጽር ሕጋዊ ባይትኡ ይኹን ምሕደራን መምርሒን ቤተ ክርስቲያን ወቦ ዘተርፈ ብዙኅ ዘይተመልሰ ሕቶታት ኣብ ቤተ ክህነት ኣለዓዒሉ ከም ዘሎ ዝበጻሕና ሓበሬታ የመልክት።

ከም ፍቓድ ኣምላኽ፦ ንሕና’ውን ነቲ በጺሑናን ዝበጻሕናን ዘሎ ሓበሬታ መሠረት ብምግባር፤ ከምዚ ዓይነት ኣካይዳ ክህልዎ ንዝኽእል እወታዊን (እንተሎ) ኣሉታዊን ገጻቱ ብመንጽር ሥርዓትን ሕግን ቤተ ክርስቲያን በቲ ሓደ ሸነኽ፤ ብመንጽር ኣብ ልዕሊ ቅድስት ቤተ ክርስቲያን ይጥጃእ ካብ ዘሎ ፍሕሶታት በቲ ካልእ ገጻቱ ብምብጋስ ትንታነ ክንህበሉ ክንፍትን ኢና።

ሓደ ካብኡ ድማ ብፍላይ ኣብዚ ወጻኢ ኣብ ዘለዉ ሃገረ ስብከታት ክግበር ዝተሃቀነን ብኸፊል ዝተተግብረን ምልውዋጥ፤ ኣቐዲሙ ቤተ ክርስቲያን ክኸፋፍል ተዓጢቑ ኣብ ምድንጋር ሕዝቢ ብዝርከብ ዘሎ ናይ ኣትላንታ ጉጅለ፡ ነቲ ዘሎ መሪሕነት በቶም ውሽጢ ኮይኖም መሲሎም ብዘሳሳዩ ልኡኻቱ ኣቢሉ ነቲ ናቱ ኣካይዳ ዝሰማማዕ ባይታ ንምፍጣር ወሰንቲ እዮም ንዝብሎም “ኣካላት” ምወላን ብላዕን ክካይድ ከምዝጸንሐ ገለ ግዱሳት ክሕብሩ ጸኒሖም እዮም። ኣብ ልዕሊ አቡነ ሼኑዳ ጳጳስ ዘሃገረ ስብከት ሰሜን ኣሜርካን ካናዳን፤ ክግበር ዝጸንሐ ጸቕጥታት’ውን ናይዚ መርኣያ እዩ። ናይ ኣውሮጳ ሃገረ ስብከት ጳጳስ አቡነ ኣትናቴዎስ’ውን፤ ብኻልእ ጉዳይ ተደልዮም ከምዘለዉ ኣምሲሎም ካብ ሃገረ ኢጣልያ ናብ ውሽጢ ሃገር ከምዝኣትዉ ዝተገብረሉ ሜላ’ውን፤ ነቲ ኣብ ኣቡነ ሼኑዳ ዘጋጠመ ፍሽለት ንምኽዋል ዝተወጠነ ምዃኑ ካልኦት መቕርቦም ዝኾኑ ግዱሳት ኣርድእቶም ካብ ኣውሮጳ ዝሃቡና ሓበሬታ የመልክት።   

እግዚአብሔር ኣምላኽ ቤቱ ካብቲ ዝውርወር ዘሎ ኵናት ክሕልዋን፤ ዝተገብረ እንተተገብረ፡ እግዚአብሔር ንጽቡቕ ክልውጦን፤ ንብፁዓን ኣቦታትና ጥበቡን ኃይሉን ከዕጥቖምን ኵልና ደቂ ቤተ ክርስቲያን ጸሎትናን ልማኖናን ወትሩ ተጊህና ናብቲ ኵሉ ዝከኣሎ ኣምላኽ ከነቕርብ ይግባእ።

እግዚአብሔር አምላኽ ሃገርናን ማኅደርናን ይባርኽ። ኣቦታትና ይዓቅበልና።